HEDER OG ÆRE

På gårsdagens allmøte for Stord Handball delte Torger Tvedten og Bjørn Lindgård delte ut tre hedersmerke frå Stord Idrettslag sitt årsmøte. Franny og Sigurd var til stade på allmøtet og fekk sitt vel fortente hedersmerke til stor applaus, medan Nicholas som ikkje kunne vera på møtet får sitt merke ved første høve. 

Sigurd og Franny fekk merka sine av Torger Tvedten frå Stord IL


Nedanfor kan du lesa dei tre grunngjevingane for tildeling av merka:

Sigurd Mosheim Sævareid (Heidersmerket i bronse)
Sigurd er ein ekte klubb-gut med stort engasjement for Stord Handball. Han har vore aktiv som trenar i klubben etter eiga spelarkarriere tok slutt, kor han har trent mange ungdomslag og både dame- og herrelaget i ulike periodar. Han har og i fleire år hatt trenaransvaret for klubben sitt lag for Tilrettelagt Handball; Stord United. Dette er ein fantastisk gjeng som Sigurd tok godt vare på i fleire sesongar. Han har og vore sportsleg leiar i klubben, og han har alltid ei sterk og klar røyst for klubben sitt beste. Sigurd er og ein sentral person i avdeling Sport under Handballfestivalen, ei rolle han har løyst på strålande måte i mange år. Han kan og smykka seg med tittelen suksesstrenar, då han er nybakt noregsmeister som trenar for laget som tok gull under fjorårets Veteran-NM i Stavanger!


Nicholas Engelsen Spratt (Heidersmerket i bronse)
Nicholas har mange år i klubben som spelar. Han utmerka seg der som ein skikkeleg innsatsspelar som alltid gav alt i alle situasjonar. Etter kvart kom Nicholas inn i rekkene i Handballfestivalen, og fann fort sin plass i teknisk gruppe. Der har han overført sine spelareigenskapar til festivaljobbing, og har lagt ned ein utruleg innsats i pinsen i mange år. Nicholas er ein gjennomførar, ein som krummar nakken og får ting gjort. Han set eit fantastisk eksempel for ungdommane i klubben og går føre med ein arbeidsmoral på aller øvste hylle. I seinare år har Nicholas vore ein pådrivar for å samla gamlegutane til veteran-NM kvart år. Dette er ein verdifull arena og samlingsplass for mange tidlegare handballspelarar i klubben, og Nicholas og gjengen fekk sitt foreløpige høgdepunkt då dei henta heim NM-gullet i Stavanger i 2023!

Franny Maria Bøthner (Heidersmerket i sølv)
Franny er eit unikum i Stord Handball, og har vore dette i mange år. Ho har i tillegg til eiga spelarkarriere i ungdomsåra vore aktiv både som trenar i klubben og oppmann på damelaget i fleire sesongar. I snart ti år har ho gjort ein strålande jobb som dommaransvarleg i Stord Handball, kor ho har rekruttert og ivareteke unge dommarar på ein framifrå måte! Ho har sete i valkomiteen i Region Vest fram til i fjor sommar, og har vore ein del av styret til Stord Handball sidan 2019. Ho har og vore ein svært viktig person i Handballfestivalen i mange år, kor ho har ansvar for dommarar og blant anna premiering, for å nemna noko. I tillegg til alt dette er Franny alltid smilande, imøtekomande og positiv til alle ho treff på Vikahaugane - Franny er rett og slett ein heilt fantastisk representant for Stord Handball og Stord Idrettslag som heilskap!


Stord Handball er utruleg takksame for all jobben desse tre merkemottakarane har gjort - og fortsatt gjer - for alle barn, unge og vaksne i og rundt Stord Handball. Me set utruleg stor pris på dykk, og gratulerar med vel fortent heder!


#viljesamhaldrespekt