Ny trenar er klar!
Det er med stor glede Stord Handball kan presentere Mark Dyhrberg Dahl som ny fulltidstilsett trenarressurs i klubben.
Dahl er 32 år frå Glyngøre i Danmark, men har budd på Færøyene dei siste tre og et halvt åra. På Færøyene har han vore trenar for aldersbestemte lag og senior damer i tre ulike klubbar. Dahl har også trenarerfaring i frå Tyskland og fleire danske klubbar. Han har også vore ein del av trenarteamet til døvelandslaget til Danmark. Dahl har brei erfaring med å utvikle aldersbestemte spelarar, han har nyttig erfaring frå seniorlag og har sjølv ei aktiv målvaktskarriere i frå spel i Danmark, Tyskland og på Færøyene. Dahl si erfaring er soleis ein svært god match med Stord Handball sin strategi om å byggje klubben frå ungdomslaga og oppover.
Dahl skal ha hovudansvaret for herrelaget til klubben, samt andre aldersbestemte lag. I tillegg skal han jobbe med å følgje opp trenarane i klubben, ha treningar for aldersbestemte lag og ha utviklingsansvar for gute- og herresida.
Dahl startar i stillinga 1. juni og har skrive ein treårig kontrakt med klubben.
Mark sine eigne ord:
«Eg har valt å takke ja til Stord etter å ha vore i dialog med klubben i to år, og no var tidspunktet godt for å dra. Klubben har gjeve med mogelegheit til å utvikle meg vidare som trenar. Eg ser fram til å trene seniorlag igjen, samstundes som eg får gleda av å arbeide med barne- og ungdomshandball. Klubben verkar å drive sundt, og ønskjer å kome tilbake til toppen av norsk handball. Den prosessen vil eg verkeleg vere ein del av. Stord er difor det riktige valet for meg,» seier Dahl.
Me ønsker Mark velkommen til oss!
